Fitubollusportföt?

Ég hef verið að undirbúa mig andlega fyrir að hefja líkamsrækt á ný. En fyrir mig er svona andlegur undirbúningur nauðsynlegur. Ég fór meira að segja í íþróttavöruverslun og fjárfesti í leikfimisfötum, en það var nú ekki heiglum hent.  Ég þurfti nefnilega að finna æfingaföt í yfirstærð og þá er ekki um auðugan garð að gresja. Eins og við allar vitum sem erum stórar stelpur eru til fitubollubúðir sem sérhæfa sig í fallegum fatnaði fyrir feitar konur. Stundum er meira að segja hægt að fá á sig föt í öðrum dömubúðum.

En íþróttavöruverslanir eru ekki með mikið á boðstólum fyrir okkur sem tilheyrum samfélagi feitra kvenna. En hvernig eigum við að byrja á því að hreyfa okkur meira ef það er svona erfitt að fá tilheyrandi flíkur?  Þarf maður að þekkja saumakonu/mann? Og hvað ætli það kosti nú?

Eftir mikla leit fann ég þó eitthvað sem ég get notað en auðvitað ekki það sem ég helst vildi. Því miður ekki til í minni stærð. En ég ætla samt að láta til skarar skríða þó ég verði ekki flottust. En kannski er til einhver svona búð sem selur sport/útivistarfatnað fyrir okkur stóru konurnar (og karlana líka), en ég bara veit ekki um hana. Samt erum við ekki svo sjaldgæfar. Ég hef til dæmis séð nokkuð margar svona konur á öllum aldri.

Jæja best að fara að sökkva sér niður í fræðimannastörfin og reyna að afkasta sem mestu á sem stystum tíma svo ég komist út í sólina áður en hún hverfur.

Athugasemdir

[Kristín Dýrfjörð, 16.7.2008 kl. 10:59]

Gott hjá þér, ég ætti náttúrulega að taka þig til fyrirmyndar ekki veitir af. Þú verður náttúrulega flottust.  Hlakka til að lesa um glímuna við líkamsræktartækin.  

[edda (IP-tala skráð) 16.7.2008 kl. 12:29]

 Ég veit svo sem ekki hvernig líkamsræktarföt líta út í dag en eru þau ekki öll teygjanleg og þess vegna fyrir feita og mjóa og allt þar  á milli svona "one size fit all" dæmi?

Hins vegar veit ég að líkamsræktarfrík eru afskræmd af einhverju annarlegu litarafti og ofurspennu í vöðvum svo þú skalt passa þig Systa mín að ánetjast ekki þessum andskota.

[Bergljót B Guðmundsdóttir, 17.7.2008 kl. 11:27]

Takk fyrir góðar ábendingar Edda en ég held að lítil hætta sé á að ég ánetjist þessu.